QUE PASA EN CANGAS?
As redes do poder cobizan os máis prezados terreos do país para asentar os seus máis lucrativos negocios, independentemente de calquera outro factor medioambiental, social ou mesmo simplesmente racional. En Cangas a ameza é que o poder político ceda ás presións dos grupos económicos máis fortes e remate recualificando a antiga conserveira de Massó, no Salgueirón. Os soños dun grande Porto Deportivo que suporía un inmenso recheo e afectaría á saúde da ría e do litoral están moi presentes nos intereses dos grupos de presión.
Con nome e apelidos: Puentes y Calzadas. Están a empregar as súas mafiosas estratexias para conquerir que se mude a cualifiación da zona e se converta así en “residencial” (cando agora é “industrial”) habendo deste xeito vía libre para unha super urbanización de luxo.
O urbanismo cangués está en mans de quen de primeiras puidera ser sensíbel ás esixencias sociais e anticapitalistas. ACE ten prometido consensuar o PXOM cos colectivos cidadáns e mesmo se pronunciou en contra da privatización do Salgueirón; a postura dos demais grupos políticos municipais non varía da que coñecemos no resto de Galiza: ambigüidade do BNG e proespeculativa de PP e PSOE.
Recentemente hai sinais que ameazan co comezo das obras dun proxecto contra o que a maioría consciente canguesa e galega se opón frontalmente, por inxusto e ilegal. Unha vez máis, e isto repítese con demasiada frecuencia, as nosas mellores paraxes corren o risco de seren sacrificadas para uso e disfrute da burguesía adiñeirada en moitos casos provinte de latitudes afastadas. Segundas residencias baleiras durante o inverno mentres nós non podemos pagar unha humilde vivenda coa suor do noso traballo, campos de golf que necesitan inxentes cantidades de auga para seren mantidos e que á súa vez manteñen as ansias dos máis desprezábeis.
Pero por se fora pouco, posto que esta descrición poderíase copiar textualmente de outros múltiples casos, o particular ao que nos referimos afecta moi especialmente á Ría de Vigo. Coa xa pesada lousa do recheo de Bouzas, a construción do Porto Deportivo nunha zona de pouco calado ameazaría seriamente o réxime de correntes e polo tanto a dinámica da propia ría, da que depende a economía de milleiros de habitantes. Habitantes, por outra, que na súa inmensa maioría non han disfrutar dos elitistas proxectos que se pretenden erguer.
A loita capitalízaa o Foro Social de Cangas, un dos principais actores do movemento veciñal en terras do Morrazo, xunto a A Ría non se Vende. Dende a comarca convocan un grande manifestación para o vindeiro DOMINGO 20, ás DOCE DA MAÑÁ na ALAMEDA VELLA de CANGAS.
Paremos a especulación e sinalemos aos corruptos.
A ría non se vende!
Cangas non se vende!
Galiza non se vende!
Chúzao
del.icio.us
