# Augas Ceives

Un dos conflitos que seguen vivos no país é o de Serrabal. Hoxe vivimos un novo capítulo de resistencia de traballadores en defensa dos seus postos de traballo. Esta mesma mañá, un cento de traballadores concentrábanse en Boqueixón para impedir o acceso dos técnicos do ADIF (de novo o organismo público español no eixo dos problemas) á mina co obxecto de dar comezo ao trazado do TAV.

Dende que se coñeceu o trazado, os traballadores opuxéronse contundentemente xa que se verían afectados cincocentos postos de traballo (en Cee, Dumbría e Sabón; ademais do propio centro de traballo situado entre Vedra e Boqueixón). Neste caso sería preciso conxugar os intereses públicos coa preservación dos postos de traballo, mais iso suporía restarlle poder e restrinxir o ámbito de poder do empresariado e ben sabemos que iso é tan utópico como impensábel. E habería que telo feito hai moito tempo…

A solución parece sinxela, pois segundo os propios traballadores abondaría co desvío de só uns metros do trazado. Estes levan emprendido outras accións, como o impedimento da sinatura das actas de expropiación dos terreos e xa afirmaron que han seguir cortando o acceso mesmo facendo quendas de vixianza.

A política social que prometera o “goberno de progreso” instalado na Xunta de Galicia está aínda desaparecida, seguimos agardando por ese xiro que seica ía mudar o capitalismo salvaxe e o neoliberalismo franquista (conxunción feita posíbel por Fraga Iribarne) no que o os postos de traballo son tan só accesorios nunha economía de mercado. Ao igual ca noutras materias Galiza segue a agardar polo cambio, mais é consciente e sabedora que non ha chegar. Por iso, as mobilizacións ocupan as novas todos os días, aínda que nos medios empresariais se fale de propaganda institucional…