OS GANDEIROS SEGUEN A REVIRARSE POLA SÚA PROPIA SUPERVIVENCIA
Abofé que mofa que supuxo o acordo asinado no mes de xullo en Madrid para establecer os prezos do leite tiña que ter consecuencias. E tenas porque estase a incumprir xa dende o principio, co que se demostra que a intención non era buscar unha solución senón frear as mobilizacións gandeiras. Esta semana o SLG volveu mobilizar aos produtores lácteos que seguen a estar tan ameazados como cando hai dous meses saíron ás rúas na chamada “Semana Branca”. Ben distinta é a actitude dos asinantes daquela estafa, UUAA e XXAA que non van alén das lamentacións.
De novo é semana de reivindicacións en Compostela, e serao a que vén en Santander, con motivo da reunión de Ministros europeos na que participará a española, galega de nacenza. Na Alameda hai situada unha carpa do Sindicato Labrego Galego na que os produtores venden leite a 8o céntimos o litro, eliminando aos verdadeiros cancros do sistema: os distribuidores. É quizais a única táboa de salvamento para poderen vivir do seu traballo, mais a infraestrutura necesaria non é doada e tórnase imposíbel sen o apoio institucional, que por outra parte está claro que nunca terán.
Cidadáns conscientes uns e curiosos outros achéganse, ben para interesarse e coñecer a situación ou ben para colaborar activamente mercando alí o leite. Produce satisfacción saber que un fai a súa achega, tan pequena como necesaria nesta loita que non é nin moito menos dun sector en concreto. É a loita dun país polo seu máis significativo medio de vida, é a loita polo dereito a vivir do seu traballo. A loita máis xusta.
Chúzao
del.icio.us
