EN LEXÍTIMA DEFENSA DOS POSTOS DE TRABALLO
O paso do verán agochou a actualidade de moito conflitos laborais latentes ao longo do país, as vacacións contribuíron tamén a arrefriar tensións… mais a volta á normalidade cotiá que sempre trae setembro destapou loitas vivas en defensa dos postos de traballo e contra o aproveitamento da “crise” por parte das empresas. Exemplo é Trèves, auxiliar do automóbil con dúas sedes en Pontevedra nas que se fabrican asentos para coches a consumir por Citroën; unha das dúas plantas enfróntase á ameaza da deslocalización, é dicir, 133 despedimentos.
Volvía a ser hoxe xornada de folga, logo doutras en datas pasadas nas que iniciaron outras accións como unha manifestación diante da grande multinacional francesa asentada en Vigo. A Citroën reclámanlle que se implique no conflito en contra da desaparición en Pontevedra dunha das dúas fornecedoras súas.
Hoxe dirixíronse ao edificio da Deputación de Pontevedra. Esíxenlle á administración provincial que se comprometa en favor dos postos de traballo e do mantemento da factoría na cidade do Lérez. A resposta que atoparon foi ver como pechaban as portas do edificio público durante dúas horas, impedindo o seu normal funcionamento. Un “secuestro” en toda regra.
Finalmente, a presión das traballadoras fixo que se tiveran que abrir as portas e estas puideran acceder ao Salón de Plenos, onde ficaron toda a tarde logo de manter unha xuntanza co Presidente da Deputación. O ente provincial é un dos máis clamorosos casos de caciquismo que se coñece neste país. O uso clientelar dunha administración pública adquire os seus máximos niveis da man de Rafael Louzán. O recente financiamento dunha actividade dun coñecido grupo galegófobo, que rexistrou unha moi cativa asistencia, é o último exemplo do uso que o PP fai da Deputación de Pontevedra.
Chúzao
del.icio.us
